يتحدث الفنان ريبال هنا عن الصوت الجبلي و الأنواع الصدرية من الغناء . ينتقل بعد ذلك الأستاذ للحديث عن الأصوات الطربية.
ريبال خضري:
"هلأ لو أنا بدي آخد أنماط تانيه من الغنى العربي، حنقول مثلاً بدي إحكي عن الغنى الجبلي، هلأ الغنى الجبلي هو صوت أكتره طبيعته هي صوت صدريه هوت حنجره لصوت صدريه من هاي المنطقه، يعني إنا إذا بدي أقول أوف جبليه راح أقول (يقرأ الأستاذ ريبال التمرين قراءة ايقاعية).
إذاً أنا أكتر شغله بدي أكون أهتم فيها إن الصوت يكون عريض أكتر لتحت حتى لما أنا بدي أقول فوق (يقرأ الأستاذ ريبال التمرين قراءة ايقاعية)، عم بعطي مثال، أنا عم بدور عكلام و بقوله براسي بأي مقام، لازم يكون لفظي كتير قاسي تحديداً بالأغاني الجبليه لازم يكون اللفظ قاسي لإن طبيعة الناس هنيك أو طبيعة الناس بالجبل بتكون لفظها كتير ستريت كتير واضح أكتر، بيكون لفظها كتير شديد أكتر، تمام، لما أنا بدي إطلع لفوق، لما أنا بدي إنزل لتحت دائماً بيكون إعتمادي بالغنى على صوتي الحنجره بس بركز إني أنا إفتح تمي خاصةً بالمناطق... بالمناطق اللي تحت، هاي بالنسبه لإذا أنا عم بحكي عن الغنى الجبلي، و أنا حكيت عن الغنى الرومانسي، هلأ بالنسبه للغناء الطربي، يعني نحنا عم بنحكي عن صباح فخري عم بنحكي عن السيده مياده الحناوي عم بنحكي عن مثلاً المطربين اللي مش موجودين معنا هلأ، عم بنحكي عن موسيقار الأجيال محمد عبد الوهاب عم بنحكي عن أم كلثوم، طبعاً أم كلثوم هي إستثناء خلينا نتركها على جنب، لو أنا بدي أقول إن أنا بدي أغني طربي فالأفضل طريقه إني أنا أغني طربي إني أنا أول شغله أركز على اللفظ بشكل... بشكل كتير يكون معقول إضافةً لذلك طبيعة الصوت بالطرب غالباً بتكون صوت رأسيه، مشان هيك أكتر المغنيين اللي بيغنوا طرب بنلاحظ إن هنن من الأصوات العاليه أكتر من إنهن يكونوا من الأصوات الواطيه أو من الأصوات الذات المساحه القليله، ليه؟ لإن الطرب بيحتاج لمساحه واسعه، بحتاج لإن أنا إقدر إنقل صوتي لمناطق الرأس أكتر، يعني مثلاً (يقرأ الأستاذ ريبال التمرين قراءة ايقاعية)، ما قلت (يقرأ الأستاذ ريبال التمرين قراءة ايقاعية).
كإني أنا عم بغني جبلي، لأ، (يقرأ الأستاذ ريبال التمرين قراءة ايقاعية) محتاج صوت رفيع إلى حدٍّ ما، أهدّي من صوتي و أنا عم بغني، أركز أكتر على العرب، مهو إسمه طرب فهاي الطرب أنا بدي تعطيني اللحن مش بطريقته التقليديه لأ، بالطريقه اللي إنتي بتغنيها بالطريقه ياللي إنتي بتحسها، غير هيك الطرب غالباً مرتبط بإرتجال إنّ إنتي ممكن تعمل إرتجال، الإرتجال الطربي بيفرق عن الإرتجال الجبلي بإنّ الطربي أنا كتير بقدر إعمل... بقدر أغير بالمقامات بقدر أستخدم تكنيك صوتي، أما بالجبلي فهو بيكون عم... عم بيركز على التكنيك الجبلي ضمن هادا الإشي، قليل ما ينقل على مقامات تانيه ضمن الجبلي، يعني ممكن ينقل على مثلاً مواويل وديع الصافي غالباً بتكون هي عباره عن موال عمقامين مقام مقامين ماكسيموم أو تلاته، أما مثلاً موال المواويل الطريبه فممكن توصل إن أنا بسبع دقايق أو عشر دقايق ممكن أكون استعرضت سبع أو تمن مقامات، هاي فرق عام عن الموال الطربي و الموال الجبلي، آخر إشي بدي أحكيه بالنسبه لدرس اليوم إن في أنماط جديده من الغناء، اللي هن الناس اللي بيغنوا بصوت... بغنى عربي و لكن بأسلوب غربي، يعني بيكون دارس أوبيرا أو بتكون الصبيه دارسه أوبيرا، بيحاولوا يطبقوا هادا الإشي اللي هنن أخدوه على الغناء العربي، طبعاً هادا الإشي بلش يشق طريقه بشكل لطيف بالعالم العربي و حتى بلش يطلع عنه تفرعات، الناس ياللي دارسه جاز تحاول تغني أورينتال جاز أو أورينتال روغ أو حتى صرنا نسمع راب بطريقه عربيه، يعني هادا الإشي لحديت الآن هو غير قادر للتقييم، في عنا مثال كتير واضح اللي هي للسيده فيروز اللي هي أكتر طريقة صوتها من وقت ما كانت صغيره اللي بيسمع بيعرف إن هي طريقة صوتها طبيعة الصوت هي طبيعه غربيه هي طبيعه بتستعمل صوت الرأس أكتر من صوت الحنجره و صوت الصدر، يعني مشكلة هاي الطريقه بس إن هي بتحد من اللفظ السليم بشكل كتير كبير، لإن بتتطرني إني... إني أنا عم بغني من المنطقه العليا بينما اللفظ بيكون من تحت فبتطر إستغني عن بعض الحروف اللي عم بتطلع من الحنجره أو من الحلق، بعض المغنيين قدروا يتجاوزوا هادا الموضوع بإن يتدربوا عليها بشكل صح و يركزوا على الحروف، ما بقدر إحكي أو أعطي أي تعليق عنها و لكن ممكن لو حدا حب إن يدرس غناء غربي يقدر يحاول و يوجد طريقته الخاصه بالغناء العربي ضمن الأسلوب الغربي، و بيكون عنا أسلوب الجديد بالغناء العربي بالعالم العربي.
هادا كان كل شي لليوم، شكراً كتير إلكن، باي."
